‘‘กิเลสา ฌาปิตา มยฺหํ…เป.… วิหรามิ อนาสโวฯ

[70]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[71]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา หรีตกทายโก เถโร อิมา คาถาโย

อภาสิตฺถาติฯ

หรีตกทายกตฺเถรสฺสาปทานํ อฏฺฐมํฯ

9. อมฺพปิณฺฑิยตฺเถรอปทานํ

[72]

‘‘หตฺถิราชา ตทา อาสิํ, อีสาทนฺโต อุรุฬฺหวา;

วิจรนฺโต พฺรหารญฺเญ, อทฺทสํ โลกนายกํฯ

[73]

‘‘อมฺพปิณฺฑํ คเหตฺวาน, อทาสิํ สตฺถุโน อหํ;

ปฏิคฺคณฺหิ มหาวีโร, สิทฺธตฺโถ โลกนายโกฯ

[74]

‘‘มม นิชฺฌายมานสฺส, ปริภุญฺชิ ตทา ชิโน;

ตตฺถ จิตฺตํ ปสาเทตฺวา, ตุสิตํ อุปปชฺชหํฯ

[75]

‘‘ตโต อหํ จวิตฺวาน, จกฺกวตฺตี อโหสหํ;

เอเตเนว อุปาเยน, อนุภุตฺวาน สมฺปทาฯ

[76]

‘‘ปธานปหิตตฺโตหํ, อุปสนฺโต นิรูปธิ;

สพฺพาสเว ปริญฺญาย, วิหรามิ อนาสโวฯ

[77]

‘‘จตุนฺนวุติโต กปฺเป, ยํ ผลมททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[78]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[79]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[80]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพปิณฺฑิโย เถโร อิมา คาถาโย

อภาสิตฺถาติฯ

อมฺพปิณฺฑิยตฺเถรสฺสาปทานํ นวมํฯ

10. อมฺพผลิยตฺเถรอปทานํ

[81]

‘‘ปทุมุตฺตรพุทฺธสฺส , โลกเชฏฺฐสฺส ตาทิโน;

ปิณฺฑาย วิจรนฺตสฺส, ธารโต อุตฺตมํ ยสํฯ

[82]

‘‘อคฺคผลํ คเหตฺวาน, วิปฺปสนฺเนน เจตสา;

ทกฺขิเณยฺยสฺส วีรสฺส, อทาสิํ สตฺถุโน อหํฯ

[83]

‘‘เตน กมฺเมน ทฺวิปทินฺท [ทิปทินฺท (สี. สฺยา. ปี.)], โลกเชฏฺฐ นราสภ;

ปตฺโตมฺหิ อจลํ ฐานํ, หิตฺวา ชยปราชยํฯ

[84]

‘‘สตสหสฺสิโต กปฺเป, ยํ ทานมททิํ ตทา;

ทุคฺคติํ นาภิชานามิ, อคฺคทานสฺสิทํ ผลํฯ

[85]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[86]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[87]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพผลิโย เถโร อิมา คาถาโย อภาสิตฺถาติ;

อมฺพผลิยตฺเถรสฺสาปทานํ ทสมํฯ

เอกวิหาริวคฺโค จตุจตฺตาลีสโมฯ

ตสฺสุทฺทานํ –

เถโร เอกวิหารี จ, สงฺขิโย ปาฏิหีรโก;

ถวิโก อุจฺฉุขณฺฑี จ, กฬมฺพอมฺพาฏกโทฯ

หรีตกมฺพปิณฺฑี จ, อมฺพโท ทสโม ยติ;

ฉฬสีติ จ คาถาโย, คณิตาโย วิภาวิภิฯ

45. วิภีตกวคฺโค